ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ၸတ်းႁဵတ်းပၢင်ယွၼ်းသူးမႄႈၼမ်ႉ၊ ပၢင်သိုပ်ႇၸႃႇတႃႇပႃႇမႆႉ၊ ပၢင်ယွင်ႈယေႃးၼမ်ႉၸႂ်ၽူႈႁတ်းႁၢၼ်လႄႈမွင်ၸႂ်ၸွမ်းၽူႈႁတ်းႁၢၼ် ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ၸိူဝ်းၵေႃႉလႆႈသဵင်ႈၵၢမ်ႇၵႂႃႇတႃႇၵူၼ်းတင်းၼမ်။ ၵမ်ႈပႃႈၼမ်တႄႉ တေလႆႈႁၼ်ၶႃႈႁဝ်းၶဝ် ႁဵတ်းပၢင်ယွၼ်းသူးပၼ်မႄႈၼမ်ႉၼႂ်းဝၼ်းထိ 14 လိူၼ်ထူၼ်ႈသၢမ်(March) ၼၼ်ႉၵူႈပီႈပီႈ ။ မႅၼ်ႈၼႂ်းဝၼ်းမႄႈၼမ်ႉလုမ်ႈၾႃႉၼႆလႄႈ ၶႂ်ႈႁႂ်ႈၵူၼ်းတီႈၸမ်တီႈၵႆႁိုဝ် ၵူၼ်းတင်းလုမ်ႈၾႃႉႁူႉႁၼ်ထိုင်ၵၢင်ၸႂ်ၶႃႈႁဝ်းၶဝ် ၵူၼ်းဝၢၼ်ႈၵူၼ်းမိူင်း ယွၼ်းသူးပၼ်မႄႈၼမ်ႉၵူႈမႄႈ ၼႂ်းၸိုင်ႈတႆးႁႂ်ႈပေႃးလႆႈလႆလွတ်ႈလွတ်ႈလႅဝ်းလႅဝ်း ယႃႇႁႂ်ႈလႆႈမီး ၽၢႆသင် မႃးတတ်းႁေႉသေ ပဵၼ်ၽေးၵူၼ်းဝၢၼ်ႈၵူၼ်းမိူင်းၼႂ်းၸိုင်ႈတႆး လႆႈလိူတ်ႇမႆႈ။ ပၢင်သိုပ်ႇၸႃႇတႃႇပႃႇမႆႉၼႆႉ ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ပိုင်ႈဢဝ်ၾိင်းထုင်းလႄႈလွင်ႈယုမ်ႇယမ်ၵူၼ်းပိုၼ်ႉတီႈသေ ၼပ်ႉယမ်ယွၼ်းသူးသိုပ်ႇဢသၢၵ်ႈပၼ်တူၼ်ႈမႆႉပႃႇမႆႉယႃႇႁႂ်ႈမီး ၽူႈၵူၼ်းလေႃးၽ မႃးယႃႉၽၼ်းမူၺ်ႉ ႁဵတ်းပဵၼ်ၵၢၼ်လူင်းတိုၼ်းပၢႆးမၢၵ်ႈမီး ၶုတ်းႁေၶုတ်းၶမ်း၊ သၢင်ႈၽၢႆသင်သေလွင်ႈ ။ ၸိူဝ်းၵေႃႉလႆႈသဵင်ႈၵၢမ်ႇၵႂႃႇ ပိူဝ်ႈတႃႇၵူၼ်းတင်းၼမ်ၼၼ်ႉ ၵေႃႁူမ်ႈသၢင်ႈၸဝ်ႈႁႆႈၼႃးၸိုင်ႈတႆး ႁူမ်ႈပႃးမူႇပီႈၸုမ်းၼွင်ႉၽူႈသဵင်ႈၵၢမ်ႇ ႁူမ်ႈႁႅၼ်းလူႇတၢၼ်းယုၵ်ႉယွင်ႈ ၽူႈႁတ်းႁၢၼ် ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ၼႂ်းဝၼ်းၶွပ်ႈၶူပ်ႇ။ ယိူင်းဢၢၼ်း ႁႂ်ႈၽူႈဢွၼ်ႁူဝ် လႄႈ သႅၼ်းႁုၼ်ႈမႂ်ႇႁဝ်းၶဝ် ၶုၵ်းၸႂ်လႆႈမွင်ၸႂ်ၸွမ်းၵၢၼ်သဵင်ႈၵၢမ်ႇ ၽူႈႁတ်းႁၢၼ်သေ ႁႂ်ႈမေႃဢဝ်ပဵၼ်တွၼ်ႈသွၼ်ၵၢၼ်တူင်ႉၼိုင်မိူဝ်းၼႃႈ ၵဵဝ်ႇလူၺ်ႈလွင်ႈၵၢၼ်လူင်းတိုၼ်းယႂ်ႇလူင်

ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ၸွႆႈထႅမ်ၵူၼ်းပၢႆၽေးၵူႈၸၢဝ်းၶိူဝ်း ၼႂ်းၸိုင်ႈတႆး ၸိူဝ်းဢၼ်ၺႃးၽေးသိုၵ်း လႄႈ ၽေးသၽႃႇဝ ၸိူဝ်းၼႆႉသေလႆႈပၢႆႈယူႇ ယၢၼ်ဝၢၼ်ႈယၢၼ်ႁိူၼ်း။ ၵေႃႁူမ်ႈသၢင်ႈၶႃႈႁဝ်းၶဝ် ယၢမ်ႈၸွႆထႅမ်ပၼ် ၵူၼ်းပၢႆႈၽေးသိုၵ်း၊ ၵူၼ်းၺႃးၽေးၾႆးမႆႈ လႄႈ ၺႃးၽေးၼမ်ႉထူမ်ႈၸိူဝ်းၼႆႉသေဢမ်ႇၵႃး ၸွႆပႃးၵူၼ်းၺႃးၽေးယွၼ်ႉ ၶူင်းၵၢၼ်လူင်းတိုၼ်းလႄႈၵၢၼ်ပူၵ်းပွင် ၸဵမ်ၸိူဝ်းၼႆႉ။ ၶူဝ်းၶွင်ၸိူဝ်းဢၼ် ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး လႆႈၵမ်ႉထႅမ်ပၼ်ၵူၼ်းပၢႆႈၽေးၵမ်ႈပႃႈၼမ်တႄႉ တေပဵၼ်ၶဝ်ႈသၢၼ်၊ မီႇၶဝ်ႈမီႇၽၵ်းႁႅင်ႈ၊ ၶူဝ်းၼုင်ႈတင်းဝႆ လႄႈ ၶိူင်ႈၸႂ်ႉတိုဝ်းၼၢင်းယိင်း။ သင်ပဵၼ်ဢွင်ႈတီႈၶဝ်ႈထိုင်ယၢပ်ႇၼႆ  ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး ႁဝ်းၶႃႈ ၸင်ႇလႆႈၵမ်ႉထႅမ်ငိုၼ်းတွင်း ။